منيو » منيو ورقم مطعم بلال

مطعم بلال بشارع مصطفي النحاس الناحية التانية من لابوار جنب مطعم باباي،

المهم ندخل في الاكل بقي طلبنا برجر وشاورما و فتةشاورما وفراخ محشية ومقلية وكبدة وسجق..

مبدأياً هو عامل شوية شاورما عدالة، اتمني يفضلوا كده علي طول، شوية شاورما مصري لحمة صافي متشعرة شوية طحينة علي شوية بصل وطماطم وبقدونس في رغيف كيزر اكبر من اي حد تاني و ب ١٣ جنيه مش مليان صوصات أو طحينة بس، ومش جو انك تضطر تدخل جوه السندوتش تدور علي ٦ حتت لحمة مثلا ما تلاقيش.

السجق بالنسبلي ياخد المركز التاني في الزيارة دي لما سألت الكاشير قلي احنا الي بنعمله من الألف للياء وهو بصراحة كان وهمي التوابل مش طاغية علي اللحمة والسجق متشوح صح و نسبة البصل الي فيه مظبوطة مش محتاج اكتر من كدة ممكن اروح كل مرة و اطلبه برضو كل مرة.

البرجر صاحبي الي كان معايا كان موهوم بيه ..هو من ناحية الحجم والسعر هو يعتبر عظيم … لكن انا كنت شايفه مكتوم ومالوش طعم اووي إلا طعم الصوصات الي حواليه.

الفراخ المحشية كانت جميلة اووي بس محتاجة تبقي متبلة اكتر من كدة اه بس انا عارف انها كانت هتبقي صعبة في اللف بعد كدة فهو اعتبروا ان الجبنة والهوت دوج والصوص الي جواها هتغني عن كده وتخلي الطعم اغني فتعوض تتبيلة الفراخ.

الكبدة بصراحة معجبتنيش خالص مش عارف ازاي ..

الفراخ الصدور المقلية حلوة طبعاً، بس دي فراخ بانيه يعني مش حوار. واحنا مفتقدين حد يعملها حلو زاي زمان.

ال omega3 ده سندوتش الجمبري و السبيط و الكابوريا .. سندوتش فيه تاتش زمان القديم بس من غير فتي كتير والزيادة فيه السبيط بس كالعادة انا محبيتش صوابع الكابوريا الصناعي عشان دي اصلا مش كابوريا خالص.

الحلو بقي هو بيقدم صنف حلو واحد بس اسمه sweet wheat ده عبارة قمح بتاع العاشورا ومعاه لبن و شيكولاتة بيضه ودبس بلح ورشة قرفة … انا شخصيا بقيت اروح اشتري بالستة و احطهم في التلاجة و افطر بيها الصبح قبل ما انزل.

مجمل التجربة انا روحت المحل ده ٣ مرات عشان اكتب البوست ده فعلا !!! عشان انا فعلاً كانت عندي مشكلة مع حمزة وان أكله علي الرغم من خامته النضيفة بس الاكل ما بيكونش ليه طعم ومكنتش عايز اخد بلال بذنب حمزة وبرضو مكنتش عايز اروح مرة الاقي الاكل حلو في مرة وباقي المرات لا خاصة انه لو ركز كدة هتبقي الشاورما بتاعته احلي شاورما في مصر حرفياً يعني.

عموما الاكل لحد دلوقتي مستواه ثابت و ممتاز و اسعاره مقارنة بأي حد تاني ارخص طبعاً.

الاسعار في الصور

ملحوظة… هو الافتتاح الرئيسي بتاعه النهاردة و عامل نص طن شاورما هدية بداية من الساعة ٣ ربنا يكون في عونهم بقي النهاردة

التليفون: 19640

افتح منيو المنيو منيو ورقم مطعم بلال
Advertisements

Leave a Reply