بــ لبن – B.Laban لو قُلنا إنه محل جديد لسه فاتح بقاله اسبوع ومسمّع في إسكندرية كلها، يبقى كل الإسكندرانية هيعرفوا إننا بنتكلم عن بـ لبن، وده بسب الضجة اللي عاملها على السوشيال ميديا واللي خلّتنا نسافرله يوم افتتاحه
المحل أصنافه كلها حلويات بسيطة ومتنوعة من مُنتجات الألبان، عندك مثلًا الرز بلبن بالمسكرات حاجة كده متصدقهاش إلا لو جربتها، عليه كمية مكسّرات مش منطقية ما بين عين جمل ولوز وفزدق، طعمه كان ممتع جدًا وسعره 20 جنيه
دخلنا بعدها على أم علي، ودي حكاية كبيرة بيعملوها بالسمنة البلدي والقشطة الفلاحي والفزدق والبندق واللوز وشوية عسل نحل وطعمها بقى مش محتاجين نقول.
جربنا بعدها الكسكسي وده معروف إن مش أي حد بيعمله حلو، بس بـ لبن كان عامله بطريقة مُميزة جدًا وكالعادة المكسرات الكتير اللذيذة ضاعفت حلاوة طعمه
عنده كمان آيس كريم بنكهات كتيرة جدًا، بس أحلى حاجة فيهم كانت المانجو، فريش جدًا وطعمها طبيعي، وفيه كمان بليلة بالمكّسرات والقشطة وحاجات حلوة كتيرة أوي
في نهاية يومنا في إسكندرية بنقول بالبُق المليان إن كل حاجة في بـ لبن كانت من دُنيا حلوة فعلًا زي بالظبط شعارهم اللي رافعينه من أول يوم، والدنيا دي عشنا فيها يوم كامل من السعادة

عنوان بــ لبن
ميدان فيكتور عمانويل – سموحة

رقم تليفون دليفري بــ لبن
15761

صور و منيو بــ لبن