لما تحب تتروق لبناني وسوري حلبي مع بعض ? المكان بيت نجوى – Beit Najwa ايه أحلي من انك تبقي قاعد في بيت من بيوت لبنان بجد وحد ييجي يسألك تحب تتروق ايه النهاردة فتلقائيا بتبقي عايز تقوله تؤبرني من حلاوة لهجتهم ويقوم منزلك welcoming عبارة عن عيش في سبت كله ورد كأنه هاند ميد واطباق زعتر ولفت وزيتون ففجأة بتحس انك سبت مصر وانطلقت علي لبنان ومش هتبقي عايز ترجع تاني روحنا قبل كدة نجرب الفطار عندهم اللي كان كله لبناني وبترويقات لبنان فقولنا أنه لبناني خلاص بس اللي اكتشفناه المرة دي وبعد ماركزنا في باقي المنيو إنهم متخصصين في الأكل الحلبي كمان وعرفنا أن صاحبة المكان اسمها نجوي فعلا لبنانية من أصول حلبية وحبت تعمل مكان تقدم فيه أكلها اللي بتتميز بيه فعملت زي بيتها بالظبط بنفس الورد والالوان والزرع والشبابيك اللي شمسها حلوة طول اليوم فهتحس انك في ضيعة لبنان بجد من كتر ما المكان فيه نوستالجيا خصوصا مع الاغاني اللي بيشغلوها ? مكناش عارفين نبتدي منين ولا منين فقررنا اننا هنجرب اكتر الحاجات اللي بيتميزوا بيها زي المقلوبة اللي بيعملوها بأكتر من نوع واللي اساسي فيها البتنجان ده غير المشويات اللبناني ولا الفتات ولا حاجات تانية كتير هتلاقوا وصف اكتر ليها مع الصور ? ولو جينا للحلو فلبنان وسوريا معروفين بالتحلاية بتاعتهم اللي مبتتقاومش زي الكنافة النابلسية مثلا والحلاوة بالجبن والمعجوقة وعيش السرايا وحاجات كتير مننا عمره مجربها كتبنالكوا عنها اكتر مع الصور

العنوان: ارينا مول – شارع التسعين – التجمع الخامس – خلف البنك الاهلي المصري

التليفون: 01112079994