منيو مطعم حجوجة

#أكل_فلاحي
#أكل_بيتي
#أكيلة_مدينة_نصر

طيب مطاعم الأكل الشرقي كتير لكن دي أول مره أكل في مكان واحس ان باكل في بيت فلاحي فعلاً اكل مالوش علاقة ب أكل المطاعم تماماً
مكان بسيط قوي في #مدينة_نصر اسمه مطعم حجوجة ست وولادها بيعملوا اكل بيتي بسمنة فلاحي حاجة بجد محصلتش في الوجود
اكلت هناك ٥ مرات كلهم احلي من بعض سواء اللحوم البلدي ولا المحاشي والطواجن اللي معمولة بزبدة فلاحي
المحاشي هناك فعلاً عظيمة هتحس انك بتاكل محشي جاي من البلد سواء الكرنب او البتنجان والفلفل وطبعاً ورق العنب المحاشي هناك فعلاً چوسي جداً عندهم اوبشن عظيم بطاية محمرة في السمنة علي حلة محشي حاجة وهم مكنتش اتخيل اني اكله بره البيت وفي كمان ممبار محشي لحمة ورز اختراع
شوربة الكوارع ماتتفوتش هناك وعندهم كمان لحمة بتلو محمرة في الزبدة محصلتش وصينية بطاطس بالريش البتلو وفي كبدة بتلو وسجق وريش محمرين في السمنة بقينا نطلب الحاجات دي في النص ما بينا
جربنا برضو طاجن اسمه طاجن الحج ده خلانا حرفياً ننور عبارة عن ايه بقي 😅 عكاوي ومخاصي مستوية في قلب نخاع تحس انك هتنور بعده
من الحاجات البيتي قوي اللي عمري ما شفتها في اي حتة انك ممكن تطلب طبق رز محشي
عندهم برضو كفتة وطرب بلدي وساعات بتشوفهم وهم بيدبحوا ويفرموا قدام عينك
جربت برضو طبق كفتة بيتي بالصلصة جو بيتي خالص
اكلتي المفضلة هناك بعد المحاشي طبق الفتة باللحمة في منه ضاني وكندوز
المكان بسيط قوي ومعليهوش ضغط وفعلاً مجربتش هناك حاجة وحشة ربنا يباركلهم فعلاً في اللقمة اللي بيعملوها
اخر حاجة جربناها هناك كان نص جدي 😅 مش ستايل المندي والكلام ده لا جو فلاحي جدي في الفرن علي فتة مصري بالخل والتوم مش محتاج اوصف حلاوته
#الاسعار ظريفة جداً بالنسبة لنضافة الأكل هتلاقو #المنيو في اخر الصور
#المواعيد من ٤ العصر لواحدة الصبح

هتلاقي حجوجة في بيت العرب في مدينة نصر عند الشهر العقاري سوق السيارات.. وانت في مصطفي النحاس هتعدي مدرسة المنهل وتدخل يمين بعد بنزينة توتال في تاني شمال في تالت يمين هتلاقيه علي ايدك الشمال..

لا يوجد توصيل ديلفرى حتى الان

وسم : /