ملوك الطواجن و اللحوم الدايبة و الأكلة الحرشة فى دولة طنطا الشقيقة ?♥️ المكان: Abo Omar الطنطاوية أكيلة درجة أولى يا جماعة مبيهزروش و معظم المطاعم اللى قالبة الدنيا فى القاهرة طالعة من طنطا أساساً فحبينا نروح طنطا نفسها عشان نفهم السر الباتع ورا أكلهم و إختراعاتهم اللى مدلدلة كروشنا ? لفينا كتير و سألنا عشان نطلعلكم بالخلاصة فكذا حد رشحلنا مطعم “أبو عمر” لو نفسنا رايحة للطواجن و المشاوى و عايزين نقعد قاعدة شيك و فى نفس الوقت مندفعش كتير ? مبدئياً المطعم شيك جداً و واخد الStyle الإسلامى فى ديكوراته هتحس إنك قاعد فى مكان ملوكى ♥️ إستقبالهم لينا كان محترم جداً و رشحولنا أجمد طواجن و عملولنا تشكيلة حلوة من المشاوى زى الكفتة و الكباب و الشيش طاووق و الريش الضانى و الأوزى ، و عشان كنا جعانين شويتين فزودنا شوية طواجن على ترشيحاتهم كانوا حكاااية زى طاجن ورق العنب بالكوارع دا كان عالمى و طاجن الباميه بالعكاوى و طاجن البطاطس بالعكاوى و طاجن لحمة بالبصل و طاجن الحمام المحشى ? أكتر حاجة حبيناها فى أكلهم إنك هتحس إنك قاعد بتاكله فى بيتك من نضافته أما بالنسبة لطعم كل طاجن أو أكلة نزلتلنا عموماً فهو عااااالمى بجد و فاهمين كويس قوى هما بيعملوا ايه و اللحمة بتدوب فى بقك من نعومتها و سواها المظبوط ? *فى أخبار إنهم ممكن يفتحوا فرع فى القاهرة قريب ???

العنوان: ٤٦ شارع النادى – برج حمزاوى – طنطا

التليفون: ٠١٢٢٦٧٧٨٨٣٦