رقم مطعم اسيوي هاوس

رقم مطعم اسيوي هاوس

Asian House
عمرك دخلت بيت صينى قبل كدة ؟؟
طيب أيه رأيك لما تدخل بيت من البيوت الصينية بكل تفاصيلة من موسيقى وسلام نفسى ? والوان و أضاءات والاكل كمان اللى معمول بمزاج وطعم جديد اوى اوى .. والمكان شيك جدا وكمان هتتصور وانت لابس اللبس الصينى وكمان هتحلى من عندهم أيس كريم مقلى فى الزيت و موز مقلى بمجرد ما بتوصل الناس بتستقبلك ع الباب تشوف أنت هتقعد فين و تمسك المنيو وانت قاعد سرحان مع الموسيقى اللى مش عارف جاية منين و الديكور اللى ألوانه أحمر Xأخضر ع الشبابيك المربعات الصغيرة اللى باين من وراها أشجار المعادى وبالتحديد شارع 9 .. دى حتى المعالق بتاعت الشوربة صينى ?
نخش بقى ع الأكل .. فوكك خالص من الزفلطة اللى انت متعود عليها فى أماكن الفاست فوود .. أنت هنا بتقعد تاكل أكل معمول صح الصح تقريبا من اقيم الاماكن اللى بتعمل أكل صينى اول حاجة لازم تتجرب هى السويت أند ساور تشيكن بصوا الناس دى عاملة الفراخ كور بس مش فراخ مفرومة لأ قطع فراخ وبعد كدة أتقلت وبقت كريسبى وبعد كدة غطست فى صوص السويت أند ساور .. يعنى انت بتاكل حاجة متغرقة فى الصوص و كمان مقرمشة زى قرمشة الزلابيا وهى طالعة طازة بالظبط .. تركيبة غريبة جدا .. مزازة الصوص وهمية مع الطعم
دى بقى نقترح انك تاكل معاها الجلاس نوديلز .. أنت يدوبك تحط العصيان اللى بتاكل بيها ( شيك اوى على فكرة ) فى بوقك وهتلاقى عقلك الباطن بيقولك هو ايه اللى أحنا كنا بناكله طول عمرنا وفاكرينة نوديلز دة .. اللى بناكلة طول عمرنا دة يا أما بلاستيك يا أما كاوتش.. نوصل بقى للاكل بالعصيان انت لو حتى مجربتش قبل كدة خالص بعد دقيقة واحدة تدريب معاهم هتبقى صينى صينى يعنى وهتاكل بالعصيان زى أجدعها مواطن صينى ? ( بس دة ميمنعش ان عندهم شوك ومعالق طبعا ) بس الاكل بالعصيان هيعلم معاك جامد وهيخليك تستمتع أكتر
لإى كمان السيزلنج بيف باربكيو هى اسمها كدة بس مفيهاش صوص باربكيو بس علشان الطريقة اللى بتتعمل بيها انه بيتشوح مع خضار و يتفرش على خضار مشوى ويجيلك وهو بيتششششش دة بقى ممكن تجربه مع الرز الصينى احنا الرز دة مش هنشرحة بس أطلبة على ضمانتنا وهيعجبك ?
الحلو بقى اللى لازم تروحلة حتى لو انت شبعان هو الايس كريم المقلى أو الموز المقلى
منعرفش أزاى بولة الايس كريم ازاى ممكن تنزل تتقلى فى الزيت ومتسيحش بس عموما من أروع ما الواحد ممكن يتخيلة دة غير ان بيبقى عليها عسل بتضيف للطعم كتير اوى اوى والموز المقلى دة أختراع يا كوتش خصوص لما تبة مع الايس كريم اللى جايلك تجربة جديدة وجميلة اوى 85

العنوان : 84 شارع 9 المعادى بجوار محل نظارات FOCUS هتلاقى مر بعد كدة سلم على اليمين اول ما تطلع تخش يمين

التليفون : 01005414823

وسم :

Leave a Reply

Your email address will not be published. Required fields are marked *