بيدو” BIDO
اكتر مكان بجيب منه اكل اخر سنتين… ومن اهم اصدقاء اخر الشهر و #المفلس_الجعان … ممكن تتغدى بـ 20 – 30
جنيه و تتبسط مش اكل اي كلام
“بيدو” عمل حاجة لطيفة اوي… فكرة الـ “ميني” … يعني ممكن تجيب ساندويتش ميني من اي حاجة تحبها عندهم من برجر بأنواعه لكبدة وسجق لكفتة و هوت دوج فتعرف تجرب كل اللي عايزه مع بعض… غير العادي و غير العيش البلدي للي حابب
و دايما الاكل حلو و سواء عندهم هناك او دليفري دايما مظبوط وجميل
الميني برجر “بيكون وجبنة” بعتبره ساندويتش محترم مش ميني عشان تقريبا اكبر من العادي بتاع اماكن كتير…
الميكس حلو وطعم اللحمة نفسها نضيف و مش متغطي ببهارات وحتى العيش حلو خصوصا الطري بتاع الميني… تقريبا بـ 25 جنيه اخر مرة جبته
اللي دايما بجيبه من هناك لو جعانة بس مش عايزة اتقل ببعت اجيب 2 ميني واحد كفتة( بالطحينة والبقدونس حلوة اوي) و واحد هوت دوج old school خالص… و لو عايزة حاجة حرشة الكبدة تجنن بأنواعها خصوصا اللي بالليّة
اكتر برجر بحبه ومبتكر عندهم الـ “تريبل شيش برجر”
البرجر نفسه حلو ده و عليه شيش طاووك ! وعليهم جبنة و بيكون و سموكد تركي! على اد ما استغربته و رفضته في الاول على اد اما عجبني والله…
عموما…
المكان ده فاتح من زماااااااان جدا و كان بتاع كبدة و سجق تحفة
هو علم من اعلام #مصر_الجديدة وبستغرب ان ناس كتير ماتعرفهوش ولا يعرفوا حلاوته… غالبا عشان مش متواجد اوي في ساحة المنافسة عالسوشيال ميديا مع انه يضرب كل اللي طالعين دلوقت بأنبهاراتهم و للاسف بيروح عن بالنا كتير
المكان صغنن جدا في ميدان الاسماعيلية متفرع من عمر بن الخطاب بعد الكنيسة اول او تاني يمين امام القهوة… و عمل شكل حلو اوي للمكان بالـ Red Phone Booth
عنوان مطعم بيدو BIDO
30 عمر بن الخطاب القاهرة
رقم تليفون دليفري مطعم بيدو BIDO
1275711850
صور و منيو مطعم بيدو BIDO
