fbpx

منيو مطعم بونز أند تشيكس

Bones N’ Chicks
الساندوتشات في المكان دا بتبدأ من 40 جنيه
وكمان مكان شيك اوى وستايلة حلو متنسوش تتصوروا فيه
مبدئيا كدة المطعم دا كل حاجة فيه مش تقليدية، حتى القعدة عاملينها Hand made و المنيو كمان معمولة بمزاج اوي، ببساطة المكان دا بيقدم ساندوتشات فراخ مقلية و حاجة اسمهاDrumsticks ..
يعني ايه درم ستيكس؟

دبوس الفرخة، بيتقلي و بيتعمل بكذا صوص مختلفين، كل صوص فيهم طعم مختلف عن التاني تماما، بتتعمل في امريكا واول حد نقابلة كصفحة بيعملها فى مصر و دي اطعم بكتير من ال Chicken wings لان معروف في الفراخ ان طعم الورك بيكون اقوى من الصدر

ممكن تختار 3 قطع او 5 و كل واحدة فيهم بطعم مختلف عن التاني لو عايز تجرب كذا طعم مختلف، عندك صوص بافلو، صوص كوري، صوص زبدة و توم و صوص الباربكيو و ممكن تختارها سادة من غير اي صوص
كل طعم من دول قصة لوحده خالص و فرق شاسع بينه و بين الانواع التاني .. طبعا دي اذواق بس اكتر طعم مزجني اللي بالزبدة و التوم ” تحفة ”
و عندك كمان الساندوتشات ممكن تختارها بنفس الصوصات دي، هتلاقي في المنيو مقاسين في الساندوتشات، لانهم عملوا ساندوتش مصغر شوية عن الحجم العادي عشان نادرا ما كان في حد بيقدر يخلصه
هقولك بقى على 3 ساندوتشات كل واحد فيهم فيه ميزة مختلفة عن التاني .. و اختار انت منهم حسب ذوقك
اول واحدة اسمه Double Volcano الفولكانو اللي يقصدوه هو بركان الجبنة، الساندوتش دا مش بس غرقان صوص جبنة دا بيبقى مبشور عليه جبنة عشان لما تيجي تاخد قطمة كدة تحس بجرعة مكثفة من طعم الجبنة مع الفراخ المقلية و على فكرة الجبنة اللي بيستخدموها حلوة اوي

تاني ساندوتش اسمه Dark matter يعني الحاجة السودة
الساندوتش دا بقى اخترااااع، الحاجة السودة المقصودة اللي هي البنجر المبشور مع الفراخ المقلية، و الساندوتش بيبقى مفروش كرنب احمر بدل الخس، فا البنجر الاحمر الغامق دا مع الفراخ و شريحة الفراخ المدملكة المقرمشة ميكس عبقري و محدش عمله قبل كدة و طعمه حلو اوي و مختلف جدا

نيجي بقى للوحش الكبير .. الفراخ الكوري Korean chicken
بيجيبوا شريحة الفراخ المقلية و يغطسوها في صوص كروري بالسمسم كدة .. طعمه مختلف بس مش شبه اي حاجة تانية، من قبل ما تاكله اصلا ريحته هتاكل دماغك، لو بتحب تجرب اكل مختلف و جديد انصحك جدا انك تجربه

في حاجة كمان لازم (لازم) تجربوها
الذرة بالجبنة، دي لوحدها اختراع و ممكن افضل اكل منها جبل من كتر ما طعمها عجبني، عبارة عن sweet corn في صوص جبنة صعب اوصفلكم الميكس دا جماله عامل ازاي .. بس فعلا دي Icon مينفعش تتنسي

نيجي بقى للحلو .. هو صنف واحد بس مفتري
بولة كدة فيها براونز على زبدة فول سوداني على جبنة كريم و صوص كراميل و ايس كريم
مش هتكلم عنها، لازم تجربها بنفسك و تكتبولنا رأيكم فيها العنوان مدينة 6 اكتوبر، مول لاسيتيه خلف مسجد الحصري و مكتبة الجامعة – الحي الثامن

رقمهم 01557726637

وسم : /

اترك تعليقاً

لن يتم نشر عنوان بريدك الإلكتروني.