fbpx

منيو مطعم الخديوى – الفيوم

الخديوى El-Khedawy
من ضمن رحلتنا للفيوم و بما انها اكتر محافظة مشهورة بانتاج الفراخ?? كان لازم نجرب عشان نشوف في فرق ولا عادية؟
كان سؤالنا لاهل البلد انتم هنا مشهورين بالفراخ نطلع على مين؟ قالك أطلع الخديوى لانه بيعمل كل حاجة تتعلق بالفراخ عندهم ??
شغال كل حاجة بالفراخ بتاعتهم يعنى تلاقى طاجن الفراخ بالبطاطس جنب حتة الفرايد تشيكن جنب كفتة الفراخ وشيش طاووك وفرخة كبيرة مشوية?
اول ما دخلنا المطعم لاقينا المكان مكيف و ديكورات اخر شياكة، قعدنا لسة هنمسك المنيو لاقينا اوردر الترابيزة اللى جنبنا بينزل فرايد تشكين مع ملوخية بالطشة و اطباق محاشي مشكلة! ??
الغريب بقى انهم بيعاملوا كل حاجة بطريقة مختلفة يعنى تلاقى الفرايد اشيكن جنبها سلطة بلدى و طحينة ورز ابيض و عيش بلدي!
تركيبة غريبة بس الاغرب انهم شغالين كدة بقالهم ٢٠ سنة من قبل هجوم الفرايد اشيكن و الناس بيحبوا الطقم دا جدا اكتر من البطاطس المحمرة و الكول سلو مع انهم موجودين بردو، بس في الخديوي بيهمهم اكتر انهم يقدموا الحاجة اللي الناس بتحبها، و لو حد عايز حاجة مختلفة يقدر يطلبها عادي من المنيو حجم الفراخ غير اللى بنشوفة فى القاهرة خالص! زي ما تكون ديناصور صغير يعني لما تيجي تطلب وجبة قطعتين بروست مثلا متعاملهمش على انهم قطعتين عاديين مش مجرد “ورك” لا حضرتك دي ((فخدة)) و في نفس الوقت الدهون قليلة فيها و لحمها طري ? تركيبة مثالية بصراحة
من اكتر الحاجات اللي عجبتنا كمان الفراخ المشوية ? مش هنتكلم تاني على حجم الفراخ الچامبو بس هي فعلا ((دجاجة)) يعني حاجة كدة تحس انها مدملكة و مالية مركزها ? الفراخ الشواية دي بتفضل تلف عالسيخ في الشواية لحد ما طعم التتبيلة يدخل لقلبها و بتتشمع من برة كانها واخدة تان زي بتاع المصايف كدة حلوة اوي و انصحكم جدا تجربوها
بيعملوا كمان حاجات خفيفة، ممكن تطلب ساندوتش زنجر ?او كريب و بالمناسبة عجينة الكريب بتاعهم حلوة اوي ? مع الفراخ الجميلة بتاعتهم دي فا الموضوع كله على بعضه حلو و تلاقي في الاخر اي كريب فراخ بيبقى ب 23 جنيه و اللي هو فيه ميكس زنجر و شيش ب 26 جنيه (دا كدة اغلى حاجة)
بصراحة بعد التجربة دي نفسي الناس دي يفتحوا في القاهرة بس بنفس الفراخ عشان التمييز كله اساسه الفراخ المدملكة دي ?

عنوان مطعم الخديوى
الفيوم، سنورس، شارع مبارك بجوار مجلس المدينة

رقم مطعم الخديوى
15598

صور و منيو مطعم الخديوى

اترك تعليقاً

لن يتم نشر عنوان بريدك الإلكتروني.