منيو مطعم المقام

منيو مطعم المقام

المقام
حضرتك بتوصل للمكان دة .. تلاقى زحمة تحط أسمك فى الويتينج علشان تاكل وتدوق أحلى فطير ممكن الواحد يجربة فى حياتة
توصل تقعد تحت لغاية لما مكان يفضى .. وطالع أدامك كل الفطير والبيتزا من الفرن ريحتها وشكلها بتبقى عاوز تهجم على اللى شايلها وتفترسة ? ? ..
المقام قدر تقريبا فى خلال سنة أنه يبقى من معالم زيارة الأسكندرية زى القلعه والبحر كدة مينفعش تسافر مرة ألا لما تروح وتاخد بركة المقام ? ?
الحمد لله أتنده على أسمنا طلعنا قعدنا وقررنا نجرب من كل صنف نوع .. بس اللى لاحظناه أن كل الناس اللى قاعده فعلا محدش بيقدر يكمل الأكل بتاعه وكلة بياخدة تيكى اواى.. الأكل كميتة كبيرة جدا ومخدوم.. بس أحنا مش زى الناس دى احنا هنخلص اللى أدامنا دة كله
المهم بقى جربنا الفطير العادى والفطير الرول والبيتزا وطواجن المكرونة والفطير الحلو كمان ( حتت الحلو دى فيها مفاجأة ) …
اولا الفطير الرول دى لوحدها حاجة بتاع متر كدة طول ( متر حرفيا ) بتجيلك متقطعه وجواها كل مكونات البيتزا .. حاجة كدة تأكل أتنين مستريح ودى طلبناها فراخ و طبعا كل حاجة بتبقى متغرقة جبن من كل حتة ..
طاجن المكرونة دة بقى عميق جدا جدا فعلا مش هتعرف تجيب أخرة ولو نزلت جيبت أخرة هتطلع بالجبنة اللى بتمط لحد أخر المحل ( على فكرة كل الكلام دة مش مبالغة فعلا ) ودة تانى حاجة من الحاجات اللى لو جبتها لوحدك مستحيل تخلصها ..
أخيرا بقى مع الفطير الشرقى ودى بصراحة كانت أكتر حاجة عجبتنا .. الفطيرة معمولة بحرفية جدا طرية مع السخونية والمكونات اللى جواها ( طلبنا ميكس جبن كانت ولا أروع ) كل حاجة كل حاجة بتأكدلك أنك قدام تجربة مقابلتش زيها قبل كدة .. جينا نطلب الحلو بقى قاللنا انتوا رايحين فين .. الفطيرة النوتيلا انهاردة ببلاش على اى ترابيزة طبعا الواحد مكنش عارف يطير من الفرحة ولا يحزن أنة جاب أخرة وشبع بس مش مشكلة هات ياعم خليها تبوظ ?
اللى عرفناة بقى انه على صفحتهم بيكتبوا يقولوا المفاجأت دى كل أسبوع بيبقى فى حاجة جديدة ببلاش …والاسبوع دة يوم الاتنين عندهم فطيرة نوتيلا ببلاش فى الصالة للسناجل ? وكمان الدليفرى عندهم ببلاش والاكل فى رمضان اللى فات كان ببلاش

العنوان : 9 ابراج الصيادله شارع مسجد حاتم- سموحه

التليفون :01022180001

وسم :

Leave a Reply

Your email address will not be published. Required fields are marked *