fbpx

منيو ورقم مطعم حلقة السمك

قعدة زى دى ??
حضرتك علشان توصل للمطعم دا بتمشي في لسان وسط البحر، و تدخل تقعد على ترابيزة في قلب البحر و اليخوت حواليك والبارشوت وجو من الخيال ((الكلام دة مش خيال الكلام دا موجود بجد في مصر ))
على فكرة مفيش كلمة واحدة مبالغة دا اللي انت هتشوفه بعينك في الحقيقة، بصراحة انا كمان انبهرت جدا بالمكان دا
دا مش مجرد مطعم تاكل فيه (دي فسحة العمر) و لازم تخطط انك تعيش التجربة دي بنفسك على الاقل مرة واحدة في حياتك، اوعدك انك مستحيل تنسى يوم جميل زي دا و هتفضل فاكره بكل تفاصيله
بتقعد عالترابيزة و حواليك البحر في كل مكانش و الهواء اللى فى اشد يوم حر ولا هتحس به و تبقى قاعد كدة بتتفرج على الطيور و تلاقي وسطهم براشوت طاير في السما و مربوط في يخت بحبل “Parasailing” و كل شوية يعديJetski .. بص اجواء كدة تحس انك في عالم تاني
حاجات بسيطة بس تحس انها بتسعد قلبك بجد،
اول ما تدخل هتلاقي على يمينك حلقة السمك و مفروشة بالسمك الطازة، هتلاقي انواع كتير سمك وقار، شعور، لوت، دنيس، هامور، قاروص، بربون و جمبري بكل الاحجام اختار منهم للي يعجبك، و توزن الكمية اللي انت عايزها “حتى لو سمكة واحدة بس” و بعد كدة تختار من المنيو الطريقة اللي تتقدملك بيها
طريقة تقديم الاكل مميزة ، احنا اختارنا سمكة مشوية سنجاري معمولة في صينية دمياطي بالكريمة و البطاطس و فلفل الوان
، و طاسة جمبري Butterfly بصوص كريمة الليمون “اختراع” و تحته مكرونة سباجيتي
نيجي بقى لطاجن قنبلة الفسفور (الفياجرا) ببلح البحر و الجمبري و بيض السبيط و بطارخ و على وشه طبقة جبنة موتزيلا و من اكتر الحاجات اللي مشهورين بيها البايلا الاسباني بيبقى فيها رز بالبسلة و السي فود و توابل خاصة بحلقة السمك و مميزين جدا بيها
الStaff بيبقوا لابسين لبس الصيادين و على فكرة ناس في قمة الذوق و الشياكة في الضياقة و دي حاجة بصراحة تحسب ليهم، من المزايا كمان اننا لما طلبنا الاوردر متأخرش مع انى كان نفسى يتأخر ??
احنا من اول ما دخلنا لفينا المكان كله عشان نختار احسن مكان نتصور فيه و كل واحد طلع بشوية صور روعة
مش لازم تدفع دم قلبك في خروجة زي دي (مفيش منيمم تشارج) انت ممكن تختار اي كمية حسب ميزانيتك
و سعر السمك يوم ما كنا هناك بيبدأ من 150 جنيه، يعني لو خدت سمكة ب 100 جنيه مع العيش والسلطة ممكن الموضوع كلها بالسلطات يكلفك 150 جنيه بس، وطبعا في اختيارات اكتر لو عايز و كل واحد عارف الميزانية اللي ممكن تناسبه .. بس الاكيد انك هتنبسط جدا و التجربة تستاهل تروحلها مخصوص ايا كان مكانك
العنوان:
زيارتنا كانت في فرع الساحل الشمالي في بورتو مارينا، عشان تدخل من البوابة بتدفع عالبوابة 100 جنيه عالفرد و بتتخصم من الحساب في المطعم “يعني مفيش حاجة هتروح عليك”
و ليهم فروع تانية في مصر الجديدة، و نايل سيتي الزمالك، و بورتو السخنة



رقمهم: 19002

وسم : / / / / / / / / / / / / / / / / / / /

اترك تعليقاً

لن يتم نشر عنوان بريدك الإلكتروني.