منيو كبابجى النصر

أكبر موزه ضاني ع الفحم في مصر😍
زيارتنا لـ كبابجى النصر

إحنا بعد كميه منشنات وكميه تحديد مواعيد اتفقنا اخيرا اننا نطلع طلعتنا ومكانتش اي طلعه .. 10 افراد عند كبابجي النصر 😂 في البدايه المطعم ده مش جديد علينا ولا على جدودنا المطعم ده من سنه 1960 و تقريبا كده متربع على عرش المشويات في مصر كلها من وجهة نظري 💪

طلبنا كيلو كباب وكيلو ريش وكيلو كفته ونص طرب و نص نيفه ضاني ونص سجق ونص ممبار مشوي ع الفحم وموزه ضاني –
وقولناله عاوزين الاوردر ده وليمه وجبهولنا بالشكل الي قدامكو في الصور 😍 وطلبنا جمبهم طاجن عكاوي وطاجن تورلي وشويه حركات كده
▪️ بالنسبه للـ Quality اولا هو معندوش في المنيو كله غير ضاني وبس وده الي بجد دوقناه في الطعم .. في مطاعم لما تطلب
منها كفته ضاني مثلا بتحس في طعمها انها مش ضاني 100 % ولكن ع العكس تمام في النصر الاكل من خبرتنا ضاني ضاني ضاني بس من غير اي حاجه والطعم بيدوب من فرط اللذه 😂
▪️ بالنسبه للموزه حاجه كده ملهاش وصف دي ليها طريقه اكل انت تطلب الموزه لوحدك و تقعد تاكل لوحدك وملكش دعوه بجد 😂 الموزه دي وزنها كيلووو
▪️ للتوضيح .. النيفه عنده ضاني ودي بيعملها من نفس قطعه اللحمه الي في الجديان بس بيعملها من الخروف ▪️ الممبار عنده ضاني ومشوي ع الفحم . رهييب

بالنسبه للسعر هو مش رخيص بس هو زيه زي كتير من مطاعم المشويات الي جودتها محترمه والي فعلا مبتخلطش اللحمه سواء ببوش او غيره
ياعني احنا دفعنا في الوليمه دي حوالي 1800 ج واحنا كنا 10 افراد ياعني كل فرد حوالي 180 ج و الاكل كان كتير جدااا ياعني 150 ج هناك هتاكل وهتتبسط جدا
➖ بنفكركم بالموزه 😍
➖ الاسعار شامله الخدمه و الضرايب
➖ عندهم في المنيو ولائم جاهزه اسمها ولائم عربي
➖ عندهم Kids Area حلوه اوي لاطفالكم
➖ عندهم بار مشروبات او ميني كافيه
➖ عندهم Bein ياعني ظبط مواعيد غداك ع مواعيد الماتشات

العنوان : 203-205 شارع الجيش من ميدان الظاهر وميدان باب الشعريه

الديليفري : 01092020278 – 02/27877707 – 02/25937331

وسم : /

اترك تعليقاً

لن يتم نشر عنوان بريدك الإلكتروني.