Louko Mama
فى مكان صغنون فى مصر الجديدة بس بيعمل عظمة زلابيا محشية شيكولاتة و لوتس و توفي و حاجات عظيمة اوي
بس دى ميتقالش عليها زلابيا دى جواهر نفيسه ما هي دي مينفعش تتقارن بالزلابيا العادية خالص
طب دا حتى الزلابيا icon مرتبطة بالفرحة و الانبساط و البهجة هتلاقيها دايما في المناسبات السعيدة .. مفيش حد ممكن ياكل زلابيا و هو زعلان
دي ((الزلابيا اليوناني)) شبه اللي بناكلها في مصر بس الفرق انها اكبر عشان قلبها بيتحشي “بجهاز مخصوص” بالحشو اللي تحبه و كمان الميزة انها طرية اوي و مش شاربة زيت .. و تقدر تحشيها حلو او حادق زي ما تحب
احساس ممتع جدا بقى لما تيجي تاكلها و اول ما تعضها تلاقيها بوووووم
تحس انها كانت بالونة و فرقعت و طعم الحشوة يملى بؤك
الموضوع مغري جداً لدرجة إننا كل ما نطلب نوع يعجبنا اوي فا نقوم طالبين نوع تاني .. نرجع نجيب نوع تالت لحد ما جيبنا المنيو كلها تقريبا
و الميزة إنك ممكن تشكل علبة نوعين مع بعض .. يعني مثلاً طلبنا علبة “10قطع” نصها زلابيا محشية توفي و متغطية بالكراميل و النص التاني موكا “قهوة” و عليها صوص شيكولاتة بيضاء .. بقولك ايه .. حواااار
جربنا كمان الشيكولاتة.. دي بقى يا سيدي بتبقى محشية كريمة شيكولاتة بالبندق و عليها من فوق حاجة كرانش عاملة زي الويڤر كدة بتقرمش اوي و فعلا بتبقى محشية لدرجة باظظ باظظ خاااالص
من اكتر الانواع اللي عجبتنا كمان الزلابيا بال Cheese cake يا جماعة جاتلكم الفكرة دي ازاي و منين؟ تحفة
هي بتبقى محشية تشيز كيك و عليها كمان من فوق تشيز كيك و صوص تختاره بقى يبقى فراولة، او بلو بيري او كراميل .. اي طعم يخطر على بالك و عكس كل الاكلات اللي في الدنيا .. دي الاكلة الوحيدة اللي هتحب تحدق بعد ما تحلي 😄 تطلب بقى طقم زلابيا محشية لبنة و زعتر .. او صوص شيدر و عليها سلامي .. تحسها ميني بيتزا
احنا كنا رايحين على اننا هنأنأ بس فعلاً لو كلت 10زلابيات هيشبعوك جداً يعني مش مجرد نأنأة عشان زي ما قولنا الزلابيا بيبقى حجمها اكبر و انت مش هتقدر تتخيل موضوع انها محشية دا مشبع و ممتع اد ايه

عنوان مطعم لوكو ماما
95 شارع الميرغني، برج الشمس، مصر الجديدة
* في الممر اللي على يمين عز المنوفي

رقم تليفون دليفري مطعم لوكو ماما
01121950359

صور و منيو مطعم لوكو ماما