منيو » منيو ورقم مطعم مؤمن

Momen – مؤمن

ملك السندوتشات .. سنتدوتشات زمان و بأسعار زمان 😍

بقالي فترة كبيرة مكلتش من مؤمن، بس دلوقتي بعد ما اكتر من حد اكدلي ان الادارة اتغيرت و مؤمن رجع زي اول ما فتح في التسعينات، و فعلا دخلت لاقيت الديكورات متجددة بالكامل، قولت يا رب تكون الساندوتشات كمان رجعت بنفس القوة زي زمان، و فعلا لاقيتهم رجعوا ساندوتش المجنم “اسطورة الساندوتشات” بعد ما كان اتلغى من المنيو في فترة معينة

و لاقينا عندهم عرض Family box 4 ساندوتشات لارج + لتر بيبسي + بطاطس عائلي كل دا ب 160 جنيه طلبنا شيش طاووق و تشيكين بانيه و دول على وضعهم زي زمان، ستيك مشروم “دا من أحلى ساندوتشات مؤمن من زمان” و طلبنا كمان ساندوتش cheese burger و بيتقدم معاهم fries و لتر بببسي

الطلعة دي كانت من كام يوم في المعادي و قولنا نعيد فيها ذكرياتنا في مؤمن و نشوف الدنيا عاملة ايه دلوقتي

و لاقينا ساندوتشات بتبدأ من 22 جنيه و الرز بالفراخ الكرسبي ب 19 جنيه و الاهم إني اطمنت على المجنم حبيبي ⁦😍😘

انا فاكر إن زمان كان كل خروجة لازم يبقى فيها زيارة لمؤمن، في اول الخروجة، نصها، اخرها .. المهم اننا نروح ناكل هناك و كل واحد كان بيبقى ليه الساندوتش المفضل بتاعه انا عن نفسي أكيل مجنم .. المجنم دا ساندوتش اسطورة ليه هيبة كدة طول بعرض ميقدرش عليه غير الاكيلة الفتوات بس اي واحد اخره ساندوتش واحد “اذا قدر يخلصه”

الساندوتش دلوقتي تقريبا كبر اكتر بقى حوالي 30 سنتي “قد دراعي” 😂😂 و عرض الساندوتش 10 سنتي .. ساندوتش عملاق بجد و لسة بنفس المكونات الكلاسيك، شرايح فراخ بانيه مع خس و مايونيز و شرايح الجبنة الشيدر .. و احلى حاجة إن العيش نفسه طري زي القطن .. لو بتحب الاكل سبايسي اطلب المجنم كرانشي، بيبقى سبايسي و مقرمش اكتر

و عاملين دلوقتي كمان طبق ميجا ميكس جريل (كفتة، شيش طاووق، صدور فراخ مشوية) مع رز و بطاطس محمرة و لقمة كايزر .. ب 75 جنيه

الجميل كمان انهم لسة محافظين على نفس الجو بتاع مؤمن اول ما فتح ، بالاغاني الاجنبي في الفترة دي، تحس ب نوستاليجا لفترة التسعينات، و المكان متجدد بالكامل و الشباب بيقدموا خدمة ممتازة و محافظين طول الوقت على نظافة المكان

رقمهم 16600

افتح منيو المنيو منيو ورقم مطعم مؤمن | منيو مطاعم توصيل الطلبات - اطلب رقم المطعم Menu Restaurant
Advertisements

Leave a Reply