هو المفترض أن الواحد لو فى اى بلد ساحلية بيبقى اختياره الاول السى فوود بس المطعم دة فى بورسعيد مينفعش نبقي هناك ونروحلة هو اول حاجة
ولو سألت اى بورسعيدى بتحب تاكل فين هتلاقى كل بيقولك مودز ( فعلا مفيش اى خلاف علية ) ..ده حتى الواحد فكر انه ينقل اقامته هناك
المهم بقى غير فكرة أنه من أحسن الناس اللى بتعمل برجر ( من الامنيات أنه يفتح فى القاهرة الصراحة ) البطاطس بتاعته من اشهر ما يمكن ومش غريب لما تلاقى البلد كلها ماشية ماسكة بطاطس زى أمستردام كدة
تخيل أن فى 28 نوع بطاطس وكلهم أحلى من بعض ( المنيو مع الصور )
المكان قعدته فى الشارع أمام مبانى كلها أثريه وقنصليات أيطاليا والصين ( يعنى مش أى حاجة وخلاص ) ..بس أحنا المرادى قررنا ناخد حاجتنا تيك اواى من الفرع اللى ناحية البحر ونخش نقعد على المياه علطول
من الساندوتشات المهمه اوى الساد دام وده يعتبر مزيج بين اللحوم والفراخ فى ساندوتش جديد ..كنا مستغربين الفكرة لكن مع أول قطمه الواحد سرح بخيالهه وقال هو أنا أزاى مجربتش الحاجة دى قبل كدة .. الساندوتش ده عبارة عن قطعه برجر مع قطعه فرايد تشيكن وصوص الجبنة الشيدر وطبعا تركى مدخن ..
تانى ساندوتش جربناه ( أو التالت بقى لو حسبنا اول واحد ساندوتش ) هو الكينج بومب ودة نقدر نقول البرجر الكلاسيك خالص اللى هو قطعه برجر ربع كيلو 250 جرام محشية جبنة شيدر وبعد كدة واخد الخس الطازة والبصل والبيف بيكون ومش بس كدة لأ دة كمان بياخد جبنة من فوق ..حاجة أخر لغوصة ومتعه
فعلا مكان نضيف جدا وأصبح أحد معالم زيارة بورسعيد وهيتحط دايما فى خطط زيارتنا

العنوان : 34 شارع عبد السلام عارف خلف السفارة الأيطالية –بورسعيد
الفرع التانى أمام نادى الصيد

التليفون :01277766687