Real sandwich
4 ساندوتشات + 4 كول سلو + كيلو بطاطس محمرة + لتر بيبسي
الحفلة دي كلها ب 300 جنيه (يعني الفرد 75 جنيه) و ليك حرية اختيار اي 4 ساندوتشات من المنيو بس المهم ان يكون منهم 2 برجر و 2 فراخ مقلية
الناس دي قدروا يعرفوا الحاجة اللي بتخلي الواحد فعلا ينبهر بالساندوتش و اشتغلوا عالحتة دي كويس اوي
طبعا مهم جدا ان اساس الساندوتش يكون حاجة محترمة و قيمة، يعني طعم البرجر لحم صافي (مفيش اي أضافات زي فول صويا) دا كان باين من الطعم و شكل شريحة البرجر نفسها
شريحة الفراخ تتبيلتها و حجمها مثاليين و تسويتها مظبوطة 👌مش شاربة زيت الBreading بتاعها بقرمش و لذيذ 😋
اضافة لكل دا اللي بيخلي ريل برجر متميزين حاجتين مهمين جداً
اولا العيش: اكيد عامل كبير جدا (من غيره ميبقاش في ساندوتش) عشان كدة بيقدموا الساندوتشات في عيش حلو اوي و طازة، من اول ما تمسك الساندوتش في ايدك تبقى مبسوط بالملمس الطري الجميل دا و في نفس الوقت قلبه متحمص و فيه سنة قرمشة 😍
الحاجة التانية الصوصات:
دا بقى السر اللي بيخلي طعم الساندوتش كله، و دا السبب في انهم بيعملوا مجموعة صوصات مميزة جدا من ابتكارهم
يعني عندك اكتر من 8 صوصات تختار كل صوص منهم ليه شخصية واضحة و مختلفة عن التاني و طبعا طعم الساندوتش كله بيروح في سكة مختلفة حسب نوع الصوص
احنا عملنا تجربة حلوة اوي و طلبنا ساندوتشين واحد بيف و التاني تشكين بس الاتنين Smoked 😋 قسمنا الساندوتشين و كل واحد اكل نص .. بس بردو مقدرناش نحدد مين احلى من التاني 😄 فعلا الاتنين احلى من بعض 👍
في ساندوتش تركيبته شدتنا اوي نجربه (بصوص البلو تشيز و دبس الرمان) هتلاقوه في الصور شريحة البرجر غامقة شوية عشان دبس الرمان بس طعمه قوي و حلو اوي 👌
الميزة بقى إنك ممكن تطلب في العرض دا بطاطس كرنكل "المشرشرة دي" او الصوابع العادية زي ما يعجبك، احنا طلبنا نص كيلو كدة و نص كدة 🍟🍟
المنيو فيها ساندوتشات مميزة جدا تخليك نفسك تطلبها كلها، بس احنا حاولنا نجرب كذا طعم مختلف و طلبنا منهم سكينة عشان نقسم الساندوتشات و كل واحد يدوق اكتر من طعم
نصيحة .. اطلبوا جنب الاكلة دي تشيز فرايز
تنزل بالشوكة في Box مليان بطاطس غرقانة صوص جبنة و عليها لحمة مفرومة و فلفل هالوبينو و تدوق طعم الميكس دا كله مع بعضه 😍😍
ستايل المطعم كاجوال ، المطعم دورين بس اغلب القعدة بتبقى فوق و الديكور شيك و المكان مناسب للعائلات و خروجات الشباب كمان
لازم تجربوا الحلو بتاعهم .. اخترررراع
عبارة عن رول محشي شيكولاته و مارشمللو و كل دا بينزل يتقلي و يطلع الرول الجميل دا مقرمش و المارشمللو دايب في الشيكولاتة، تيجي تاكله تلاقيه بيمط معاك زي الموتزريلا كدة بس دا مسكر و طري و رهيييب👌

العنوان 6 اكتوبر، ميدان الحصري، الأمريكية، برج 5

رقمهم01101073535