Sahtein’s Oven
جماعة أنتوا مبتخرجوش فى الزمالك لية ?
أنت تشوفلك يوم أجازة علشان تنزل تتروق ترويقة لبنانى ? ( تفطر يعنى ) والحاجات بتبدأ من 7 جنية و تنزل تتمشى فى شوارع الزمالك الصبح لان خروجة الزمالك مختلفة عن اى خروجة فى مصر
التمشية الصبح تفتح النفس وتبسط مع الجو اللى فى لسعة سقعة حلوة
طيب هنقولكم على حاجة جامدة جدا تتعمل فى الزمالك .. فى بنزينة فى شارع 26 يوليو .. عند كلية تربية موسيقية ..البنزينة دى ملتقى الناس اللى بتبقى عاوزة تشرب القهوه بتاعت الصباحية وأحنا منهم ?
فكنا كعادتنا بناخد القهوه الصبح على أنغام فيروز فى الزمالك ولقينا ان فى مكان جديد فتح فى ركن البنزينة اسمه صحتين .. عبارة عن المعجنات اللبنانى بتتخبز كل يوم الصبح وأنت تخش تنقى من الحاجات اللى فى المنيو
احلى حاجة فى المنيو أنها تنفع لطول اليوم يعنى مش فطار وبس يعنى لو رحت بليل بردو هتتبسط .. ع العموم علشان الشيف لبنانى فاالمعجنات هناك مظبوطة جدا وعندهم كمان سندوتشات راب جميلة اوى ..
ممكن تبدا بنقنقة المعجنات اللى ب 7 جنية اللى قولنا علها ودوول ممكن تجربوهم كلهم زى زعتر وسبانخ وصفيحة بعلبكية ? ( ولو مفهمتش حاجة من المني قولهم يشرحولك كل حاجة بس ع العموم كل الحاجات عندهم حلوة اوى و الاهم نضيفة وطازة ) ومتنسوش تجرب الشوكلاتة اللى بالغزل
الراب بقى فى راب الللبنة حاجة خفيفة ومنعشة لان بيبقى فيها لبنة وطماطم وخيار ونعناع مكونات كلها بهجة ? هتاكل منه وتفضل خفيف وممكن تاخد معاه عصير برتقال ..
الطاووك اه مش فطار بس خدناه معانا واحنا ماشيين تتبيلة الفراخ مع السويت كورن والتومية والخيار المخلل خللوا الطعم حلو اوى اوى وعجينة الراب ممتازة جدا
واللى ننصحهالكم بشدة هى التركى او الديك الرومى اللى معاها خس ومايونيز وسويت كورن وخيار مخلل الحاجات دى كلها مع بعض عاملة طعم حلومع نفس العجينة اللى قولناها فوق
عموما اللى بيدور على خروجة متكلفوش كتير يعمل الكلام اللى فوق دة ?

العنوان : امام سينما زاوية – الزمالك داخل اوتوستوب شارع شجرة الدر

التليفون :01275420615