Shoma Fried Chicken SFC
وجبة البروست بتبدأ من 33 جنيه ?? ومعندهومش حاجة أسمها أجنحة
و”السعر اللي في المنيو هو اللي بتدفعه” مفيش زيادة خدمة ولا ضريبة ?
اهو دا من انضف و اقوى مطاعم ال Fried chicken اللى قابلناها بس مش كتير اللي يعرفوه، جودة ممتازة و اقل سعر للبروستيد?
الناس دي بتتعب في نضافة الفراخ ودة بيبان اوى لما تمسك الحتة وتفصصها? ، ال breading طعمه حلو اوي و مش شارب زيت، تتبيلة الفراخ واصلة لقلبها و الفراخ تسويتها ممتازة
بجد انت بتاكل حاجة فيها كل المواصفات المثالية للبروستيد ? و اسعارهم اقتصادية جدا

اختارنا الوجبة ال 18 قطعة (ب 210 جنيه) القطع كلها مشبعة جدا، يعني لو عددكم 6 كل واحد هتاخد 3 قطع دبوس، ورك، صدر (من غير اجنحة) حجم القطع محترم و مليانة لحم طري، في نفس الوقت تسويتها ممتازة، مع الفرايز، العيش، التومية و الكول سلو

الكول سلو فريش و الدريسنج بتاعه تحفة، التومية بتاعتهم ” مثيرة للجدل ” عاملة زي التومية بتاعت الخليج و البراند المشهور في السعودية، و دي طعم الثوم فيها اقوى، بس اغلب الناس في مصر متعودين على طعم التومية السوري عشان كدة في ناس بتستغرب طعمها شوية

حتى العيش اللي بيتقدم مع الوجبة دي بيتعمل مخصوص عشانهم، هش و مسكر و يتاكل لوحده حاف من حلاوته

غير البروستيد او البروست Fried chicken ? بيقدموا وجبات ستربس في الحنين اوي .. يعني ب 32 جنيه هتاكل 3 قطع ستربس كبار مع بطاطس و تومية عيش و كاتشب و لو زودت 8 جنيه كمان هتاخد 4 قطع ستربس

الريزو ب 20 جنيه بيجيلك متغطي بقطع الفراخ و معاه الصوص تحط منه زي ما تحب .. يسندك في نص اليوم لو عايز حاجة خفيفة و بتاكل فراخ و رز ب 20 جنيه بدل ما تجيب بيهم باتيه و كولا ?

عندهم 6 ساندوتشات تختار منهم اللي يعجبك، احنا اختارنا ساندوتش البلدوزر و دا يعتبر مبني مكون من 6 قطع ستربس و تاخد القطمة منه فيها بيكون و موتزريلا ستيكس مع الهالوبينو و الخيار المخلل و صوص شوما مع السويت شيلي صوص، كل الحاجات دي مع بعضها عاملة ميكس رهيب

الديكورات بسيطة جدا و جو المكان هادي، ال staff مهتمين بنضافة المكان طول الوقت و ذوق جدا في التعامل

العنوان 7 عمارات الهيئة، مصطفى النحاس، أمام مدرسة المنهل، مدينة نصر

رقمهم01113399976