ليه ما بنفطرش في اماكن زي دي كل يوم ?
المكان Warda – وردة
فطار اوبن اير في مصر الجديدة وسط الشجر والزرع والروقان وفجأة تلاقي فطير مشلتت من اللي قلبك يحبه داخل عليك بكل حبشتكاناته من عسل وطحينة ومش وجايين يروقوا عليك علي الصبح كده او مثلا شوية فول وطعمية وبيض اومليت وبيض بسطرمة وجبنة مقلية وأي فطار حرش يخطر علي بالك.. تقعد تفطر بقي وجبنك شوارع مصر الجديدة بهدوئها وبشكل عمايرها القديمة وفوقيك وحواليك شجر وزرع وانتيكات والوان في كل حته ففعلا منظر المكان مبهج جدا وخصوصا في الجو ده الاوت دور فيه الصبح مع الشمس اللي بتدي شوية دفا مع كوباية القهوة هيعيشك الشتا صح
هما في الاصل حريفة اكل شرقي فهتلاقيهم بيعملوا اي حاجه سواء مصري او لبناني وعندهم المشاوي عظمة اوي بس احنا حبينا نركز في اللبناني علشان عرفنا انهم بيعملوا فيه حاجات مش بنلاقيها كتير زي كفتة الكرز اللي بتتعمل بصوص الكريز وبتتغرق بيه وكفتة الخشخاش اللي بتتعمل مع سبايسي ريد صوص والاتنين كانوا احلي من بعض..مقدرناش نشوف اسم الفتة قدامنا في المنيو ومنطلبهاش ولما جينا عند الحواوشي قررنا ندوس في المصري شوية برضو وخدنا كمان مكرونة بالسجق ومحاشي كرنب وورق عنب لزوم النقنقة وفي كمان جزء من القعدة indoor كله انتيكات ومووده سبعيناتي جدا واضاءته وديكوره عتيق هيرجعك لزمن تاني خالص
العنوان:
فرع الكوربة: ١٧ شارع الثورة – الكوربة – مصر الجديدة
التليفون: 01123333009
فرع زايد: مدخل زايد ٢٠٠٠ مول ليجيندا – الشيخ زايد
التليفون: 01122888857
فرع التجمع: داون تاون مول – شارع التسعين – التجمع الخامس
التليفون: 01122888854
فرع المهندسين: ٢ شارع جزيرة العرب – متفرع من جامعة الدول العربية
التليفون: 01122988886