منيو » منيو مطعم عم نجيب

3am Naguib – عم نجيب
المطعم دا كل ما فيه عن الروائي المصري نجيب محفوظ “أول روائي مصري حاصل على جائزة نوبل في الادب” و من اول ما تدخل هتلاقي في كل مكان حواليك افيشات الافلام المقتبسة من اعماله، و صور الفنانين اللي مثلوا في الاعمال دي كلها، و في ركن مخصوص لمكتبة فيها كتب نجيب محفوظ
المطعم لسة جديد بس هتحس فيه بأصالة الزمن القديم، من لون الخشب، و الالوان الهادية المريحة للعين، حتى الشباب اللي شغالين هناك لابسين كسكتة و البنطلون ابو حملات زي موضة الستينات
طبعا المنيو مصرية 100% لاقينا فيها الاكلات اللي كنا بناكلها في بيوت اهالينا و احنا صغيرين، الاكل اللي يرد الروح و يرم العضم، الاكل اللي بالسمنة البلدي، و الجميل ان كل حاجة معمولة بطريقتها الاصلية مع لمسات بسيطة مميزة اكلهم جدا
اولا طلبنا شوربة كوارع و فعلا دي انضف كوارع شوفناها في مصر، تحس انها كوارع عاملة باديكير قبل ما تتطبخ 😍😍
و من اكتر الحاجات اللي عجبتنا و نرشحهالكم بقوة ( الحمام المحشي ) اولا فردة الحمام كبيرة و تملى العين، محشية حتى الانفجار و شكلها فعلا يفتح النفس
عندهم بقى حاجة اسمها (( طاجن كمونية)) دي عشان تتعرف على المطعم صح لازم تطلبها اول ما تروح، انا شخصيا لو رحت 100 مرة في كل مرة هطلب الكمونية دي، عبارة عن طاجن لحمة مع البطاطس و الجزر في صوص كمون و فلفل مع الاعشاب، و يا سلام بقى لو طلبت معاها الرز بالزعفران و الطحينة بصوص الليمون المعصفر .. حاجة فخيمة و تستاهل بؤك
طيب فاكرين لما الواحد كان يروح عند جدتة ويلاقيها جايبلة الرز والملوخية والكوكو ( اللى هى الفرخة ) 😍😍 هما عندهم نفس الوجبة دى بالجو بتاع المكان هتلاقيهم جايبينهالك كدة وانت بقى اعمل فيهم زى ما كنت بتاكل فى بيتك جدتك
بعد ما خلصنا ختمنا بالحلو و احنا بنتفرج على روتانا كلاسيك، بيعملوا بطاطا مشوية بالكراميل و المكسرات 😍 حاجة كدة خيال علمى
المطعم كله لسة جديد و كل حاجة لسة بشوكها، و الشباب هناك مهتمين جدا بالخدمة، و القعدة في المكان مريحة لدرجة انك مش هتحس بالوقت هناك

العنوان: 6 شارع عبدالمنعم رياض، المهندسين

رقمهم:01203511113

افتح منيو المنيو منيو مطعم عم نجيب | منيو مطاعم توصيل الطلبات - اطلب رقم المطعم Menu Restaurant
Advertisements

One Response to “منيو مطعم عم نجيب”

  1. neveen abdo says:

    One of the best restaurants I have ever eaten at love the place ,services and food is amazing

Leave a Reply