ماما
هتقعد عالنيل في ارقى مكان في مصر (الزمالك) في قلب باخرة ثابتة و بينك و بين النيل متر واحد بس!
الكلام دا في واحدة من اشهر العلامات في كورنيش الزمالك (نايل سيتي) اصلا و انت داخل بتعدي على “جسر السعادة” اللي بيوصلك لحد الباخرة .. الجسر دا نفسه معمول بطريقة شيك جدا، حتى هتلاقي اغلب الناس بتروح تتصور هناك و فعلا بالنهار او بالليل الصور هناك بتطلع حلوة جدا
اتصورنا .. ندخل بقى الباخرة و انزل عالسلم هتلاقي مطعم “ماما” عاليمين، المطعم كله عالنيل Indoor& outdoor
المكان شهرتة الاساسية فى الفطار
بس برضو الاكل العادى بتاعهم الى حد كبير كويس
انت بتبقى قاعد عالنيل على طول “مفيش اقرب من كدة” و شايف قصادك كل معالم القاهرة اللي على النيل زي المتحف المصري و برج القاهرة ، الحتة دي تحديدا من جمالها بيتصور فيها اغلب الاعلانات و الاغاني
المطعم اسمه “ماما” عشان يعتبر ايقونة للاكل البيتي، و حتى الديكورات اللي بيستخدموها كلها حاجات من الرفايع و المقدسات الموجودة في كل بيوت المصرية زي مكنة الخياطة و برطمان الليمون المخلل و ازازة الشربات .. تحس فعلا انك في بيت ماما
احنا اول ما قعدنا لاقينا عالترابيزة عرض لوجبة فيها كل حاجة تقريبا (فراخ و شيش طاووق وكبدة وكفتة وسجق) + طاجن بامية + طاجن بطاطس + محشي كرنب + ملوخية + 4 رز + طقم سلطات و بيتزل معاها كمان طبق بسبوسة تحلي بيه
الوجبة دي كلها ب 480 جنيه (بالخدمة و الضريبة( تكفي 4 افراد .. يعني الفرد ب120 جنيه و هتاكل و تحلي كمان و مش هتدفع اي حاجة زيادة و على فكرة في وجبة تانية ب250 جنيه لفردين، مناسبة جدا لل Couples سواء بقى مخطوبين او متجوزين ..

العنوان الزمالك- مركب نايل سيتي – كورنيش الزمالك، بالقرب من نادي الجزيرة الرياضي

رقمهم19002