كافيه أكلة و حدوتة اكتشفنا فطير مشلتت حدوتة في حدايق الاهرام ? من أول ما دخلت و ريحة الاكل بالسمنة ملعلعة و فايحة في المكان، افتكرت على طول الاكل زمان على الطبلية في بيت جدتي، فعلا من زمان أوي مدوقتش أكل بالجمال دا المنيو اللي بيقدمها المطعم مصري بس الاكل المصري بطعم و أسعار زمان، اصلا كنت داخل اتغدى بس لما شفت الست قاعدة قصاد الفرن بتعمل الفطير المشلتت مقدرتش امسك نفسي و طلبت فطيرة جنب الاكل أول حاجة طلبتها الرز المعمر (حادق) حاجة متكلفة و متعمر فعلا، وشه احمر و قلبه ابيض و شارب اللبن و القشطة و اللحمة من طعمها و لونها واضح انها بلدي، طاجن يرد الروح ? عندهم اختراع عظيم عبارة عن طاجن بطاطس باللبن و القشطة، أول ما شفتها في المنيو استغربتها شوية، بس من أول معلقة انبهرت جدا بجمال طعمه، طعم غني جدا و أول مرة أجرب الاختراع دا، البطاطس اللي على الوش متحمرة بالسمنة و حرفها فيه سنة قرمشة بسيطة، قلب البطاطس طري و شارب طعم اللبن و القشطة و واخد نفس من ريحة الطاجن و دا سر من اسرار العم المميز و حتى تقطيعة البطاطس نفسها فيها فن الطاجن دا عجبني جدا لدرحة إني خلصته لاخر فتفوتة فيه طلبنا كمان طبق محشي مشكل فلفل و بتنجان و كوسة، و فعلا وجودهم كان ضروري مع الاكلة دي، الرز حلو بس الخلطة كانت محتاجة تتحيق اكتر من كدة شوية “حسب ذوقي الشخصي” حسيتها دلعة شوية بس رشة ملح صغيرة ظبطت الدنيا كلها الملوخية عندهم من الحاجات اللي بيقدموها بطريقة مميزة و فعلا مختلفة و معمولة بحرفية، خصوصاً إن التومة اللي في الطشة متحرقتش و مستخدمين توابل مخلية طعم المولوخية sugary شوية و ريحتها و طعمها يدخلوا على مركز السعادة في المخ يعملوله فرح و تبقى آخر انبساط الحواوشي هما اللي بيعملوه من الالف للياء، يعني العيش بخلطة اللحمة و السجق و كل حاجة بتتعمل في المطعم، جربت حواوشي بالجبنة و التاني بالسجق و الاتنين احلى من بعض و ليهم after taste جميل، سعره في الحنين أوي “25 جنيه” بس لو أكيل و عايز حاجة تسد معاك خد 2 حواوشي .. هتملى التانك و تنبسط الاكلة ناقاصها ايه؟ بتنجان مخلل ? البتجان المخلل بيتعمل مسلوق و بيتقدم معا الطماطم المخللة، حاجة حرشة جميلة و بتكمل الطعم المكان عبارة عن مطعم و كافيه انت ممكن تاكل و تحلي و تقعد ندتشرب شاي أو قهوة بمزاج على صوت أم كلثوم، و القعدة في ترابيزات و كراسي و كنب الوانهم مبهجة أوي، و في كمان قعدة عربي و ملابس بدوية عشان تتصوروا بيها و كمان في شاشات و بروچيكتور بيعرض ماتشات الكورة و في WI-FI غير كدة المكان دا يبقى مناسب جدا لاعياد الميلاد عشان واسع و جوه الحلو كمان افتكاسة تستحق شهادة الايزو ” أم على بالشيكولاتة” حاجة كدة معمولة بمزاج عشان تعدل بيها مودك و ترطب على قلبك، و لو عايز حاجة خفيفة بيعملوا طبق فواكه بصوص الفراوله خفيف و صوص الفراولة مخليه مبهج كدة و في نفس الوقت خفيف بعد ما خلصت عرفت اسم المطعم “اكلة و حدوتة” جي منين من غير ما اسأل .. انك لما تاكل هتنبسط و تحكي عنه و هي دي الحدوتة ? مفيش ضريبة على الاسعار الخدمة 12.5% في دليڤيري في حدائق الاهرام

العنوان: ٦ب شارع الثروة المعدنية، حدائق الاهرام، بجوار المصرية للاتصالات WE و امام خنذر للنجف

رقمهم:01022000332