fbpx

رقم و منيو مطعم بلبع سيدي جابر الاسكندرية

بلبع – سيدي جابر – الاسكندرية
من اول السنة ديه و انا عاوز انزل بوست بس مش اي بوست و خلاص لاني لو تعرفوا يمكن في الفترة الاخيرة ديه جربنا كام حاجة جداد طلعوا طفش الطفش و حته كانت كويسه جدا و على خريطتنا بس خلاص غيروا الادارة (ده حعمل تعديل على بوستهم الجميل و اوضح موقفي منهم) و ده مش موضوعنا خالص
احنا استغلينا التوقيت الجميل ده ان البرد ساب الاسكندرية يومين و رحنا احنا الاسكندرية و انا بالنسبة لي بلبع هو دايما اول مكان على خريطة الاكل بتاعتي هناك سواء لحوم او حتى اسماك (من فترة مجربناش السمك بس كنت بحبه) انا اول مرة اروح الفرع الجديد و ماشاء الله زحمة رهيبة و ويتنج ليست احنا بس حظنا حلو اننا وصلنا قبل المعجنة (قبل ٥) فمستنناش كثير و الجميل في المكان هناك ان فيه ساحة كبيرة جدا للباركينج فمفيش مشكلة ركنه
احنا كلنا طلبنا مع بعض و طبعا احنا ملوك الخفايف فمزودناش و لا حاجة اتبقت معانا
انا حقولكم طلبنا ايه و رأينا في اللي اكلناه و شربناه
عصير ليمون نعناع : مظبوط ظبطه تمام التمام مع اني في العادي مدورش عليه بس لفت نظري من بعيد فطلبته و الغريبة انه مبيمررش و عنده افكار عصاير كثيرة تانية
• السلطات :
* كافيار : انا بحبها جدا و لازم ادور عليها و اطلبها لانها مبتنزلش الا لو قلتلهم عليها و طلعت حكاية 👍
* ثومية : اساسية دايما على ترابيزتنا فبرضه بننوه عليها علشان متتنسيش و دايما متميزة
* زيتون مخلل : انا مليش فيه بس كان جنبيه شوية طماطم و خيار متبليين فاكلتهم و عجبوني انهم ميعتبرووش مشطشطين بس فيهم لسعة خفيفة فطلبت طبق منهم طلع حراق اكثر بس برضه طعم
* بطاطس مكعبات : فهمت انها حراقة فبصراحة خفت منها مع ان شكلها حلو و معندهمش مش حراق منها
* بطاطس مهروسه : ملمسها غريب ملفتتش نظري قوي
* جبنة قديمة : تهافتوا عليها و عجبتهم جدا
* بنجر : ده نسفوه نسف
* غنوج و طحينة : دوول اساس التغميس للكييفه
* العيش : عيش بلدي سخن موجوج مش كبير مقاس الرغيف بس ايه يخلي اللي مش جعان ياكل و لو الواحد نسي نفسه في السلطات مش حيعرف ياكل لما الاكل ينزل
• الطلبات الجانبية:
* ارز ابيض بالكبد: جامد جدا صراحة لان الكبد بصوصها حلويين و محطوطين في النص فاغلب الرز شارب الصوص
* طاجن ارز معمر باللحم البتلو : انا مذقتوش بس عجبهم جدا
* طاجن مكرونة فرن بالجبنة : الولاد عجبتهم ع الاخير و الكل انبسطوا منها و قاسموهم فيها
• البروتين : ندخل بقى ع العميق
* شيش طاووك : ديه كانت اسياخ شيش للاولاد بس لولا الملامة كان كله هجم لو متعضوش من العيال 😉
* نيفة : لولاش انها حادقة شوية بالنسبه لي كانت حتاخد العلامة الكاملة بس جميلة طبعا و ملمسها و طعمها و تسيوتها صح
* ريش بتلو : برضه حادقة سيكا بس طعمها حلو و التسوية تمام و للاسف الملح قلل شوية يعني بدل من ٩.٥ ل ٩ الا ربع من ١٠
* كباب و كفتة : الكفتة حصل عليها ضرب نار من حلاوتها بس الكباب كان احد نجوم الترابيزة فعلا سوبر تتبيلة و تسوية و اللحمة مظبوطة جدا و الجميل ان الاغلبية مش من هواته فانا اتظبطت 😉
* مزاليكا اسكندراني : كنا جربناها اخر مرة بس في فرع تاني فقعدنا نشرحلهم بس مش هي هي بتاعت المرة اللي فاتت (كانت زي ورقة كبدة و كلاوي في فويل) ديه كانت عبارة كبدة و كلاوي و مخاصي و قلوب “بتحبك😉” متشوحيين على الجريل و فيهم صوص انا اتكيفت جدا منها و الصوص خطير تغمسه بقى و لا تضيفه على الارز الابيض من فوق كله كان في اللغوصة صراحة 😘 بس مش الكل انبسطت منها بس انا استلزيتها
* كبدة مشوية : و اخيرآ و ليس اخرآ المتر قالي عليها و بعدين قال مفيش و بعد شوية كان معدي جنبي سمعني بقول تاني ع الكبده قالي حشوفلك و قد كان فعلا و اووووو كبده رايقه متبلة على المزاج و مشوية اعلى سيكا م المستكاوي بس فل عجبتني و انبسطت جدا انه وفرها

عنوان مطعم بلبع – سيدي جابر – الاسكندرية
فرع سيدي بشر
فرع سيدي جابر
فرع روزانا ك 56 الساحل الشمالي
فرع امواج ك 136 الساحل الشمالي
فرع مارينا 5 لسان الوزراء الساحل الشمالي

رقم تليفون دليفري مطعم بلبع – سيدي جابر – الاسكندرية
035497555

صور و منيو مطعم بلبع – سيدي جابر – الاسكندرية
وسم :

اترك تعليقاً

لن يتم نشر عنوان بريدك الإلكتروني.