Edrtna قدرتنا
مينفعش رمضان يفوت من غير ما تتسحر على عربية فول
مجموعة الشباب دي عاملين حاجة بسيطة و حلوة اوي
قعدة بسيطة في الشارع مع فروع زينة و شلت عالرصيف، مفيش دوشة .. مفيش مزيكا .. لاصوت يعلو فوق صوت التشششش و البطاطس بتتحمر
بالرغم إني كنت متخيل انها خروجة شباب بس، لكن في الحقيقة كل مرة بروح بلاقي المكان فيه اسر و عائلات اكتر، تلاقي ام و اب لسة شباب و معاهم النونو، اسرة فيها كل الفئات العمرية و الكل قاعد مبسوط بالقعدة الجميلة دي
احلى حاجة إن اسعارهم عادية جداً .. طبق الفول ب 14 جنيه و بيعملوا قرص طعمية جامبو تحس إنه معمول على ايد فضائيين بس حلوة اوي عندك كمان طعمية عين كتكوت و لما كنت هناك مع صحابي سمعنا حد بيقول معاك جبنة دوريتوس هنا .. ايه دا؟!
ايه جبنة دوريتوس دي! كان نفسنا نعرف بس واضح إن كان في اقبال جامد عليها فا خلصت
تخلص سحورك و تضرب كوباية الزبادي الجميلة و بعدها كينج الترطيب بقى
بطيييخ .. بمجرد ما شوفنا البطيخ حسينا بطراوة كدة .. تقعد تمزمز كدة في البطيخ مع اسرتك و صحابك و بالهنا و الشفا
خروجة بسيطة و جميلة و مش مكلفة خالص، و الشباب هناك مهتمين بالنضافة و روحهم حلوة في استقبال الناس .. تحس انهم شباب شبهنا كدة و عايزين يعملوا حاجة حلوة “عربية فول نضيفة” و دي في حد ذاتها حاجة تحترم جدا و تستاهل التشجيع

عنوان مطعم قدرتنا
شارع يوسف عباس خلف مسرح مدينة نصر

رقم تليفون دليفري مطعم قدرتنا
01066991772

صور و منيو مطعم قدرتنا