مطعم اسماك هنجري بوت

Hungry Boat
ترابيزة في قلب النيل “عند اوسع حتة في النيل” في مكان راقي و شيك و بتاكل أكلة سمك و سي فود، وسط المراكب الشراعية و تقعد تاكل بمزاج و انت بتتفرج على غروب الشمس عالنيل وبسعر هتلاقية اقل من محلات سمك كتير
ال View و القعدة دي تستاهل انك تفضى دماغك خالص
هانجري بوت مطعم أسماك (مش تقليدي) داخل باخرة ثابتة Blue Nile على النيل مشهورة جدا على كورنيش المعادي، كتير بعدي من قصادها بس اتفاجئت بصراحة بفخامة المطعم

بص حاول وانت بتقرأ معايا تجربتي تكون لوحدك في مكان هادي علشان هخدك من ايدك وهنروح في مكان كله اغاني لاتيني و هتتخيل معايا منظر النيل وطعامه اكله السمك وجو رومانسيه وليله كبيره اوي 😁 تجربتنا النهارده مع مطعم هنجري بوت في المعادي مطعم متخصص في الاسماك في مركب بلو نايل , من بدايه دخله المكان بره وانت هتحس انك سافرت بره القاهره ومصر خالص شيك جدا هتدخل جوه هتلاقي زي باب سفينه هتدخل هتلاقي نفسك جوه المطعم والترابيزات وحرفيا هتلاقي نفسك وسط النيل 😍 هتلاقي المكان ديكوراته كلها بحر واسماك وديكورات في كل مكان مع موسيقي لاتيني هتخليك بتسأل نفسك هو انا سافرت بره مصر ولا ايه بالظبط 😅
وهتلاقي الاستاف في المكان لابس يونيفورم (صيادين) والاكل بيجي ليك علي مراكب ميكس غريب كده في المكان بيعيشك (تجربة) البحر من البدايه 💙
اكتر حاجه عجبتني في المنيو عندهم التنوع
بمعني انا واحد من الناس عندي عقده من الاسماك من الريحه الزفاره وبأكل انواع معينه وبطريقه معينه – في المنيو عجبني ان مدخلين المطبخ الايطالي و البرازيلي بحيث انك تأكل السمك بطعامته وحلاوته وفي نفس الوقت تسأل نفسك هو فين الزفاره والشوك والموضوع ده للي عندهم اطفال كمان هيفهموه اوي تعالوا مع بعض اكلمكم علي بعض الاطباق الي جربتها هناك
اول حاجه كده لازم تبدء بيها (اسمع مني لازم تبدء بيها) شوربة كريمه فواكه البحر الايطاليه هتدعيلي 😉 مش ممكن علي الطعامه شوربة سي فود فيها جمبري وسبيط مع وايت صوص و جبنه بارميزان و كابوريا محترمه كده نايمه وسطهم 😁 شوربه تحفه تحفه تحفه
وجربنا كمان شوربة اسمها توم يام شوربة تايلاندي بس سبايسسسسسسسي نصيحه لو ملكش في السبايسي متفكرش فيها او دوق واطلع علي المطافي 😅 وهتلاقي ان الشوربه بيكون تحتها شمعه علشان تخلي الشوربة سخنه لحد اخر وقت
جربنا كمان باستا هنجري بوت اسباجتي بطعم فواكه البحر مع بقدونس وبينك صوص ونازل عليها جبنه ايطالي مبشوره مع جمبري وبلح البحر من احلي الباستا الي جربتها في حياتي 10/10 من طعامه الصوص والقوام تحفه وجربنا كبير عائلة المطعم (مركب هنجري بوت)
وده مركب بينزل ليك بيبقي ميكس جريل سي فود فيه من كل حاجه جمبري جامبو وكالمياري وسمك فيليه وسالمون جريل وسبرنج روول محشي جمبري حاجه تعمل عظمه فسفور 😁 والمركب ده بيكفي 3 اشخاص وكمان تقدر عندهم تطلب اي نوع سمك فريش اليوم بيومه لو من هواه الفصفصه 😁
دول ناس بيحشوا سمك الدنيس جمبري انت متخيل الي بيحصل ! 😱
ومن الاطباق الي عجبتني اوي طبق اسمه (أولد باي) سمك فيليه بيتعمل بكريمه اللوز وبيدخل الفرن تحتيه خضار سوتيه ومبشور عليه لوز وشرائح لمون وحاجه في منتهي اللوز 😍
وكمان جربنا عصير (هنجري بوت) عباره عن عصير انانس بيبقي مع توت بري في ابريق ومعاه كأس فيه تلج وشرائح ليمون – نصيحه لازم تطلبوا بعد الاكله ديه هيرطب عليك ومن نفس احساس وانتعاش البحر ومن الحاجات الي عجبتني في المنيو ان هتلاقي مع كل طبق شرح لمكوناته وفوائده ولو سألت اي حد من الاستاف عن مكونات اي طبق هيحكي ليك عن قصه الطبق وهتعيش معاه فيلم واقعي لدرجه انك هتقوله علشان خاطري الحقني بالطبق ده بسرعه 😅
✅ كمان المكان بيقدم عمل ديكور غداء او عشاء رومانسي (مجانا) تماما حتي لو هتيجي تطلب طبق شوربة (متضحكش شوفت اجانب هناك كتير بيطلبوا طبق شوربه بس عادي)😉 بس المهم انك تحجز موعد قبلها لان المكان بالحجز
✅ وكمان بيقدم تورته (هديه) لاي حد بيحتفل بعيد ميلاد او عيد زواج بس بشرط تكون حاجز قبلها ✅ المكان هناك كبير وواسع جدا فعمرك ما هتحس بالازدحام وعلشان كده مناسب جدا للخروجات العائليه والمناسبات وفي ترابيزات بتخد اعداد كبيره جدا وبتقدر هناك انك تتغدي طبق باستا ب 95 جنيه او من طبق شوربه ب 65 جنيه والفكره ان خروجات اكلات السمك بتكون مش متكرره بس الفكره انك بدل ما هتأكل في مطعم سمك وسط القاهره لا انت بنفس السعر ان لم يكن اقل هتأكل في مكان شيك جدا وسط فيو نيل مفيش احلي من كده 😍 المكان شيك جدا جدا والتعقيم هناك علي اعلي مستوي

مواعيد المكان :
من الساعه 12 ظهرا الي الساعه 11:30 مساءا

العنوان مركب بلو نايل مطعم هنجري بوت كورنيش النيل المعادي امام جمعيه الاورمان

رقمهم 01276500060

وسم : / /

اترك تعليقاً

لن يتم نشر عنوان بريدك الإلكتروني.