Nos Balady – نص بلدى
حواوشى على كورنيش النيل و الرغيف بيبدأ من 30 جنية??
الناس دي قعدوا درسوا الحواوشي و عملوا كل انواع الحواوشي البلدي و اخترعوا اصناف حواوشي جديدة “Signature” عشان كدة المكان اسمه “نص بلدي” و النص التاني افتكاسات
الابداع وصل لدرجة انهم عملوا رغيف حواوشي محشي كراميل و مارشمللو مع chocolate chips و شرايح اناناس و زبدة الفول السوداني و سموه Overdose ??
موضوع كبير زي دا كان لازم نعمله زيارة نستكشف فيها الكلام الخطير دا
عندهم طبعا الحواوشي باللحمة و السجق و البسطرمة و اي رغيف حواوشي ممكن تطلبه بالجبنة او وش بيتز ?
حبك لرغيف الحواوشي هيبدأ من اول ما ينزل عالجريل و تطلع ريحة التتبيلة و العيش البلدي المقرمش دا يشرب عصارة اللحمة و هي بتستوي لحد ما ياخد Tan برونزي جميل
احنا كان حظنا حلو و حضرنا لحظة تعامد الشمس على رغيف الحواوشي ???و هو بيستوي “هتشفوها في الصور” و بصراحة اكتر حاجة عجبتنا إن تتبيلة اللحمة و بهارات السجق مش مغطيين على طعم اللحمة نفسها
لكن في Level تاني خالص من الاختراعات هو دا اللي هنتكلم عنه
حواوشي Sea food بالجمبري و الكابوريا و السبيط و الكاليماري و السمك الفيليه مع انشوجة و رشة توابل السي فود من الاخر قنبلة فسفور متنكرة في شكل رغيف حواوشي ?
حواوشي Cold cuts بيبروني، تركي، سلامي مع جبنة موتزاريلا، الاختراع دا عجبني جدا، خفيف و الحاجات المدخنة دي مع الجبنة حلوة اوي
حواوشي Mix cheese “من غير لحمة” هو رغيف مقرمش مليان جبنة بس، دا يبقى جميل اوي عالفطار و بردو حاجة خفيفة
و اي رغيف حواوشي بيتقدم معاه بطاطس محمرة و علبة طحينة و مخلل ?
طلبنا كمان المكرونة بالكبدة و المكرونة بالسجق و دي بقى طعمها بلدي 100% و مظبوطة من حيث الكمية و الجودة و السعر ?
عندهم حاجة اسمها مراكب كبدة و سجق “بتتعمل في رغيف بلدي شبه المركب”
عجبنا جدا مركب الكبدة بالجرجير خصوصاً مع صوص صوص الليمون المعصفر بالمسطردة و العسل، طعم الليمون المعصفر هو الاساس و الطعم الاقوى بس النتيجة في الاخر حلوة
المهم احنا اخدنا المراكب دي و طلعنا عالنيل، خدنا معانا الحواوشي، قعدنا ناكل على كورنيش الڤلل و اتصورنا و اتمشينا في الجو الجميل دا

العنوان: بنها، الڤلل، الميدان، بجوار الاهلي ستور

رقمهم:01201744714