Samy Salem Patisserie – حلوانى سامى سالم
اقدم محل حلواني في بورسعيد!
وحاجة كدة تعتبر من التراث والكنوز
يعنى واحد من معالم زيارتها زى الفنار والمعدية و وديليسبس
مينفعش تروح بورسعيد من غير ما تجرب فطيرة جلاش سامي سالم بالعسل و السكر و الكريمة و جوز الهند و الزبيب .. الفطيرة دي بيعملوها بنفس الطريقة من الخمسينات
فطيرة مغرية اوي، بتتقدم سخنة و الطبقة اللي ع الوش مقرمشة بس من قلبها طرية و (محشية كريمة وقشطة ) بتفضل على نار هادية و بمجرد ما الصاج يتفرش بتتخطف خطف الفطيرة دي ماركة سامي سالم و ب 15 جنيه
نركز بقى عشان الاصناف دي اسمائها شبه بعض (ملوكي& مليكة & بنت السلطان) 👇
ملوكي 👑 اختراعهم حاجة كدة بين الكيكة و البسبوسة، محشية قشطة خفيفة و احلى ما فيها إن سكرها خفيف مبتجزعش و بتدوب و انت بتاكلها 💗
مليكة 👸دي بقى من تحت بتقرمش زي البسكوت و قلبها كريمة مش مفهومة كدة و عليه من فوق بسكوت بودرة .. خيال بقى
بيعملوا كمان ملفيه عالمي و بكام؟ ب10 جنيه
يا جماعة طب ازاي الملفيه الرهيبة دي ب10 جنيه!
مشهورين كمان بالكنافة الملفوفة .. مرعبة 👌
عبارة عن كنافة ملفوفة و محشية كريمة و شيكولاتة بالبندق، الكيلو منها ب 80 جنيه و ممكن قطعة واحدة هتعملها حوالي 7 جنيه .. بنت لذينة شكلها مغري جداً
ببص في التلاجة لاقيت تارت عليها تارت كبشة عين جمل بالعسل و الكراميل شكلها مغري اوي ب 25 جنيه، الناس دي واقعين على منجم مكسرات و بيجيبوا منه ببلاش 😂😂
و من الحقائق التاريخية المثبتة “سامي سالم” اول حد عمل الكنافة الجبنة و مشهورين من زمان جدا بيها جدا حتى من قبل ما الكنافة بالجبنة تعمل ضجة 😄
و تاكل من عندهم بقى الحلويات الشرقية بتاعت زمان بطريقيتها الاصلية 👌 زي الهريسة و العزيزة بالكريمة اللباني و القشطة و في اختراعات زي كنافة كندر، كنافة لوتس، كنافة روشيه حاجة اخر عظمة
الساليزون تقدر تشكله براحتك و تختار النوع اللي بتحبه و تخيل الحاجات الشيك دي الكيلو ب 90 جنيه، ممكن تجيبلك طبق مشكل تفطر بيه الصبح مع كوباية شاي في البيت او مكتبك في الشغل “حاجة شيك” و خفيفة
المحل دا لو فتح في القاهرة هيعمل قلق جامد بالاسعار و الجودة و التشكيلة الكبيرة دي كلها
عندك اشهر تورتة 🎂 “بلاك فورست” نجمة اعياد الميلاد كل شباب مصر ب 70 جنيه .. تقريبا دا نفس سعرها في عيد ميلادي سنة 1990 😂

عنوان حلوانى سامى سالم
بورسعيد، شارع السواحل و اسوان و ليهم فرع في بورفؤاد، شارع الشعرواي بجوار مدرسة الصنايع

رقم تليفون دليفري حلوانى سامى سالم
01206259999

صور و منيو حلوانى سامى سالم