طاسة وسط البلد
شايف جبل الباستا دا ? كل دا ب 25 جنيه
مش لازم تدفع كتير عشان تاكل و تشبع .. انت ب 25 هتشبع و تجيب ناس تشبع ?
الراعي الرسمي لخروجة وسط البلد .. المكان دا تقدر تروحه و انت مطمن 100% في اي وقت في الشهر لان أيا كانت ميزانيتك هتلاقي اختيارات كتييييير سعرها بسيط و الاكل بكميات خزعبلية
الراجل دا كريم اوي و ماشي بمبدأ خلي الناس كلها تاكل و تنبسط ?
عاملين منيو فيها كل انواع الباستا ريد صوص، وايت صوص، باستا، مكرونة بالكبدة، سجق، سي فود و انواع تانية كتير و كلهم باسعار حنينة اوي و في نفس الوقت بيقدملك كمية محترمة جدا أشك إن ممكن حد يقدر يخلصها
المطعم اسمه طاسة وسط البلد و هما اصلا متخصصين في طاسات الجبنة بأنواعها و أغلبهم من 50 جنيه ل 70 جنيه و بيقدموا طاسات ميكس على اسامى الافلام زي رصيف نمره 5 ، ابن حميدو، الزوجة التانية
احنا جربنا طاسة النمر الاسود الچامبو اصلا من اول ما الصنية دي نزلت عالترابيزة ريحتها تدخل على النافوخ الطول حلوة اوي عامل زي ريحة صنية المكرونة بالبشاميل و هي لسة خارجة من الفرن
دي فيها لحم ببصل، كفتة، سجق، لحمة مفرومة، باستا و مشروم .. صنية تكفي من 3 ل 4 افراد ب 225 جنيه
كل طاسة بيتقدم معاها عيش شامي و طبق فيه عيش محمص بالتوم، خيار مخلل، بطاطس محمرة
بمناسبة التوم عندهم شوربة عدس جامدة جدا تنفع لما الجو يسقع شوية وعلى وشها طشة توم مثالية
و من السندوتشات اللي ننصحكم جدا تجربوها ساندوتش الجبنة الرومي المقلية “حكاية” و تلاقي قطع الجبنة بتقرمش في قلب العيش الطري و الموضوع كله جميل
الحلو عندهم بقى اختراع .. طاسة سكالانس فيها صوص شيكولاتة، مربى، عسل، قشطة و حلاوة طحينية و بيتقدم معاها سبت عيش و انت تغمس الطاسة .. و طلبنا كمان زبادي خلاط و دا كان اروش Drink زمان و انت في المصيف ??
الصالة دورين مكييفين و في شاشات تلفزيون بيعرضوا عليهم افلام اكشن

العنوان: ممر عمارة ستراند، باب اللوق، شارع التحرير، خلف فسخاني شاهين

رقمهم:0227934834